မန္တလေးခရိုင် ရွေးကောက်ပွဲကော်မရှင်က အင်န်အယ်လ်ဒီ ကိုယ်စားလှယ်လောင်း ဒေါက်တာဝင်းမြင့်ကို ပယ်ချခြင်းသည် ဖွဲ့စည်းပုံကို ကျော်လွန်ဟုဆို

မန္တလေးခရိုင် ရွေးကောက်ပွဲကော်မရှင်မှ အမျိုးသားဒီမိုကရေစီအဖွဲ့ချုပ်(NLD) ၏ မန္တလေးတိုင်းဒေသကြီး လွှတ်တော်ကိုယ်စားလှယ်လောင်း ဒေါက်တာဝင်းမြင့်ကို ကိုယ်စားလှယ်အဖြစ်မှ ပယ်ချခဲ့ခြင်းသည် ၂၀၀၈ ခုနှစ် ဖွဲ့စည်းပုံအခြေခံဥပဒေကို ကျော်လွန်လုပ်ဆောင်ခြင်းဖြစ်သည်ဟု အထက်မြန်မာပြည် ရှေ့နေများ ကွန်ရက် တာဝန်ခံ၊ တရားလွှတ်တော်ရှေ့နေတော်ဝင် ဦးခင်မောင်သန်း က ပြောသည်။

၎င်းက သြဂုတ် ၂၄ ရက် နံနက် ၁၁ နာရီတွင် မန္တလေးမြို့ မီဒီယာစင်တာ၌ ပြုလုပ်သော သတင်းစာ ရှင်းလင်းပွဲတွင် ပြောကြားခြင်း ဖြစ်သည်။

ဦးခင်မောင်သန်းက “ ရွေးကောက်ပွဲဥပဒေနဲ့ ၂၀၀၈ ဖွဲ့စည်းပုံတို့ ထိပ်တိုက်တွေ့တာပဲ။ ဘယ် ဥပဒေကို လိုက်မှာလဲ။ ဖွဲ့စည်းပုံအရဆိုရင်တော့ ဖွဲ့စည်းပုံအခြေခံခုံရုံးအဖွဲ့ကပဲ ဆုံးဖြတ်လို့ ရမယ်။ ဒါကြောင့် ဖွဲ့စည်းပုံအခြေခံခုံရုံးကို တင်မှကို ဖြစ်မယ်။ ဒီပြဿနာကို ဖြေရှင်းနိုင်တာက ခုံရုံးပဲ ရှိတယ်။ ဒီအတိုင်း ဆက်သွားမယ်ဆိုရင်တော့ ဖွဲ့စည်းပုံကို ကျော်လွန်ပြီး လုပ်တာပဲ” ဟု ပြောသည်။ 

မန္တလေးတိုင်းဒေသကြီး လွှတ်တော်ကိုယ်စားလှယ်လောင်း ဒေါက်တာဝင်းမြင့်အား မန္တလေးခရိုင် ရွေးကောက်ပွဲကော်မရှင်က သြဂုတ်လ ၁၈ ရက်တွင် ရွေးကောက်ပွဲဆိုင်ရာဥပဒေ ၁၀(င) ဖြင့်ငြိသည်ဟု ဆိုကာ ပယ်ချလိုက်ခြင်း ဖြစ်သည်။

အဆိုပါ ဥပဒေတွင် မွေးဖွားစဉ်က နိုင်ငံသားမဖြစ်သေးသော မိဘတစ်ပါးပါးမှဖြစ်စေ၊ နှစ်ပါးစလုံးမှဖြစ်စေ မွေးဖွားသည့် နိုင်ငံသားသည် ရွေးကောက်ပွဲတွင် ရွေးကောက်တင်မြှောက်ခံရခြင်း မရှိစေရဟု ပါဝင်သည်။

သို့သော်လည်း ဖွဲ့စည်းပုံအခြေခံဥပဒေ အခန်း(၈ )၊ ပုဒ်မ ၃၄၅ တွင် ဖွဲ့စည်းပုံအခြေခံဥပဒေ အတည်ပြု ပြဋ္ဌာန်းသည့်နေ့တွင် နိုင်ငံသားဖြစ်ပြီးသူသည် ပြည်ထောင်စုမြန်မာနိုင်ငံတော်၏ နိုင်ငံသားများဖြစ်ကြ သည်ဟု ပါဝင်သည်။ ယင်းနှစ်ချက်ကို နှိုင်းယှဉ်၍ ဦးခင်မောင်သန်းက ပြောခြင်းဖြစ်သည်။

တိုင်းဒေသကြီး လွှတ်တော်ကိုယ်စားလှယ်လောင်း ဒေါက်တာဝင်းမြင့်၏ မိဘနှစ်ပါးသည် နိုင်ငံခြားသားများ ဖြစ်နေခြင်းကြောင့် ပယ်ချထားခြင်း ဖြစ်သည်။

ဦးခင်မောင်သန်းက “ ဒေါက်တာဝင်းမြင့်ရဲ့ မိဘက မွေးတုန်းက နိုင်ငံခြားသားဆိုတာ ဟုတ်တယ်။ ဒါပေ မယ့် အခြေခံဥပဒေ အတည်ဖြစ်တဲ့အချိန်မှာ မြန်မာနိုင်ငံသား ဖြစ်နေပြီ။ ၁၉၈၂ ဥပဒေအရ မြန်မာနိုင်ငံ သားကို ဖြစ်နေတာပဲ။ ဖွဲ့စည်းပုံအခြေခံ ဥပဒေအခန်း ၈ အရလည်း နိုင်ငံသားဖြစ်နေပြီ” ဟု ပြောသည်။

ထိုသို့ ပယ်ချခံလိုက်ရခြင်းကြောင့် သြဂုတ် ၂၂ ရက်တွင် တိုင်းရွေးကောက်ပွဲကော်မရှင်ထံသို့ အယူခံဝင် ထားပြီး အဖြေကို စောင့်နေသည်ဟု ဒေါက်တာဝင်းမြင့်၏ ပြောရေးဆိုခွင့်ရှိသူ ဦးကျော်စိုး က ပြောသည်။ 

၎င်းက “ အောင်မြင်မယ်လို့ ယူဆပါတယ် ”ဟု ပြောသည်။ ရွေးကောက်ပွဲကော်မရှင် အဖွဲ့ခွဲ ကလည်း အယူခံဝင်ထားသည်ကို ပြန်လည်စိစစ်နေသည်ဟု ရွေးကောက်ပွဲကော်မရှင်အရာရှိ ဦးတင်ဝင်းအေး ကဆို သည်။

မန္တလေးခရိုင်တွင် ပါတီ ၁၁ ခုမှ ကိုယ်စားလှယ်လောင်း ၁၁၄ ဦး တင်သွင်းထားရာ ပြည်သူ့လွှတ်တော် ကိုယ်စားလှယ်လောင်း ၄၀ ဦး၊ အမျိုးသားလွှတ်တော် ကိုယ်စားလှယ်လောင်း ၈ ဦး၊ တိုင်းဒေသကြီး လွှတ်တော် ကိုယ်စားလှယ်လောင်း ၆၆ ဦး အမည်စာရင်း တင်သွင်းခဲ့ကြသည်။

မန္တလေးတိုင်းဒေသကြီးအတွင်းတွင် ပြည်သူ့လွှတ်တော်ကိုယ်စားလှယ် ၁၃၀ ဦး၊ အမျိုးသားလွှတ်တော် ကိုယ်စားလှယ် ၃၆ ဦး၊ တိုင်းဒေသကြီး လွှတ်တော်ကိုယ်စားလှယ် ၂၃၁ ဦးနှင့် ရှမ်းတိုင်းရင်းသားရေးရာ ဝန်ကြီးနေရာအတွက် ၅ ဦး စုစုပေါင်း ၄၀၅ ဦးရှိသည်ဟု ရွေးကောက်ပွဲကော်မရှင်မှ ထုတ်ပြန်ထားသော စာရင်းအရ သိရသည်။ 

ပြည်ထောင်စု ရွေးကောက်ပွဲကော်မရှင်၏ ခရိုင်အဖွဲ့ခွဲအဆင့်ဆင့်က အမတ်လောင်းစိစစ်ရေးလုပ်ငန်းများ ကို သြဂုတ်လ ၁၈ ရက်မှ ၃၁ ရက်ထိ ပြုလုပ်မည် ဖြစ်သည်။

mizzimaburmese.com