နေပြည်တော် နိုဝင်ဘာ ၉
အမြန်လမ်း ရဲတပ်ဖွဲ့အနေဖြင့် အမြန်လမ်း မကြီး မိုင်တိုင် (၉၉/၄) အနီး တွင် ဖြစ်ပွားခဲ့သော အရက်မူးပြီး ပေါက်တူးကိုင်၍ ခရီးသွား ယာဉ်များအား အနှောင့် အယှက်ပေးရန် ကြံစည် ဆောင်ရွက်ခဲ့သည့် ကျူးလွန်သူများကို ဖော်ထုတ် ဖမ်းဆီး ရရှိ ခဲ့ကြောင်း သိရသည်။ နိုဝင်ဘာ ၆ ရက် ညနေ ၅ နာရီ ခန့်တွင် ရန်ကုန်-မန္တလေး အမြန်လမ်း မကြီး အတိုင်း နေပြည်တော်မှ ရန်ကုန်ဘက်သို့ မောင်းနှင်လာသော ကိုယ်ပိုင်ယာဉ်ငယ်လေးစီးအား ကျောက်တံခါး မြို့နယ် မြို့ချောင်း အမြန်လမ်း ရဲစခန်းအပိုင် မိုင်တိုင်အမှတ် (၉၉/၄) အရောက်တွင် အမြန်လမ်း၏ အနောက်ဘက်ခြမ်း အပိုင်းတွင် ရပ်နေသူများထဲမှ လူတစ်ဦးသည် ၎င်းကိုင်ထားသည့် ပေါက်တူးဖြင့် ယာဉ်ကို အန္တရာယ်ပြုသည့်သဘောဖြင့် ချိန်ရွယ်ရမ်းခဲ့ကြောင်း၊ ယာဉ်တစ်စုံတစ်ရာဖြစ်ပွားပါက လုယက်ရန် ရည်ရွယ်ချက်ဖြင့် ဆောင်ရွက်ခြင်းဖြစ်ကြောင်း နိုဝင်ဘာ ၇ ရက် Facebook လူမှုကွန်ရက် စာမျက်နှာများတွင် ဖော်ပြပါရှိခဲ့သည်။
ဖော်ပြပါသတင်းနှင့် ပတ်သက်၍ နေပြည်တော်ရှိ အမြန်လမ်း ရဲတပ်ဖွဲ့မှူး ရုံးမှ တပ်ဖွဲ့မှူး ရဲမှူးကြီးနေဝင်း ဦးစီး၍ အခင်းဖြစ်နေရာသို့ သွားရောက် ကွပ်ကဲခဲ့ပြီး အခင်းဖြစ်ရပ် မိုင်တိုင်တစ်ဝိုက်ကို ပိုက်စိပ်တိုက် ရှာဖွေရန်၊ ပြစ်မှုကျူးလွန်ရန် ဆောင်ရွက်သူများကို ဖော်ထုတ်အရေးယူဆောင် ရွက်နိုင်ရန်တို့ကို ရဲမှူးကျော်မျိုးမြင့် ဦးစီးအဖွဲ့၊ မြို့ချောင်းအမြန်လမ်း ရဲစခန်းမှူးနှင့်အဖွဲ့ စသည်ဖြင့် အထူးအဖွဲ့များဖွဲ့စည်း၍ တရားခံဖော်ထုတ် ရမိရေးအတွက် ဆောင်ရွက်ရန်ညွှန်ကြားခဲ့သည်။
ဆက်လက်၍ အမြန်လမ်းရဲတပ်ဖွဲ့မှ အထူးဖွဲ့စည်းပေးထားသည့် အဖွဲ့များဖြင့် သတင်းရရှိသော နေရာတစ်ဝိုက်ကို ပတ်ဝန်းကျင်ကျေးရွာများရှိ ကျေးရွာအုပ်ချုပ်ရေးမှူးများနှင့် အဖွဲ့ဝင်များ၊ ရပ်မိရပ်ဖများနှင့် တပ်ဖွဲ့ဝင်များ ပူးပေါင်း၍ ပိုက်စိပ်တိုက် လိုက်လံရှာဖွေခြင်း၊ စုံစမ်းခြင်းများ ဆောင်ရွက်ခဲ့ရာ အခင်းဖြစ်ပွားသည့် ညနေ ၅ နာရီက မိုင်တိုင်အမှတ် (၉၉/၄) အနီး၌ ညွန့်ဝင်းပါ သုံးဦးမှာ အရက်မူး၍ အမြန်လမ်း၏ အနောက်ဘက်လမ်းအစပ်၌် ရပ်နေသည်ကို တွေ့ရှိရကြောင်း၊ ၄င်းတို့ သုံးဦးမှာ ကျောက်တံခါးမြို့နယ် ဆင်ဇလုပ်ကျေးရွာအုပ်စုနေ ညွန့်ဝင်း၊ ကိုလင်းနှင့် ကရင် (ခ)ဝင်းထူးတို့ သုံးဦးဖြစ်ကြောင်း စုံစမ်းသိရှိရပြီးနောက် အမြန်လမ်းရဲတပ်ဖွဲ့ဝင်များက ညွန့်ဝင်း (၄၂နှစ်) ဆင်ဆိပ်ကလေး ကျေးရွာ ကျောက်တံခါးမြို့နယ်နေသူကို မိုင်တိုင် (၉၉/၄) နှင့် (၉၉/၅) ကြား၊ လမ်း၏ အနောက်ဘက် တစ်မိုင်ခန့်အကွာရှိ လယ်တဲမှလည်းကောင်း၊ ကိုလင်း(၅၅နှစ်) ကျောက်ခဲကုန်းကျေးရွာ ကျောက်တံခါးမြို့နယ် နေသူကို အမြန်လမ်းအနောက်ဘက် နှစ်ဖာလုံခန့်အကွာရှိ လယ်တဲမှလည်းကောင်း ရှာဖွေတွေ့ရှိခဲ့သဖြင့် ခေါ်ယူစစ်ဆေးခဲ့ရာ ၄င်းတို့မှာ အခင်းဖြစ်ပွားသည့်နေ့တွင် ညွန့်ဝင်း၏ လယ်တဲ၌စု၍ အရက်သောက် ကြကြောင်း၊ အရက်သောက်စဉ် ၄င်းတို့သုံးဦးနှင့်အတူ ဇော်မိုးထက်နှင့် အရှည်ကြီးဆိုသူတို့လည်း ပါဝင်ခဲ့ကြောင်း စစ်ဆေးတွေ့ရှိရသည်။
အမှုနှင့်ပတ်သက်၍ အရက်ဝိုင်းဖွဲ့သောက်ခဲ့သည့် ဇော်မိုးထက် (၂ဝနှစ်)၊ ဆင်ဆိပ်ကလေးကျေးရွာ၊ ကျောက်တံခါးမြို့နယ် နေသူအား စစ်ဆေးခဲ့ရာ အခင်းဖြစ်ညနေ ၅ နာရီတွင် ညွန့်ဝင်း၊ ကိုလင်းနှင့် ကရင် (ခ) ဝင်းထူးတို့မှာ လယ်တဲမှ အရက်သောက်ပြီး အမြန်လမ်းဘက် သို့ထွက်သွားခဲ့ကြောင်း၊ ညွန့်ဝင်းသည် ပေါက်တူးကို ထမ်းယူသွားကြောင်း၊ ကရင်(ခ) ဝင်းထူးမှာ တီရှပ်လက်တိုအင်္ကျီ အနီရောင်ကို ဝတ်ဆင်ထားကြောင်း၊ ညွန့်ဝင်းမှာ အင်္ကျီလက်ရှည်အဖြူရောင်ကို ဝတ်ဆင်ထားကြောင်း၊ မိုင်တိုင် (၉၉/၄) အနီးလမ်းလယ်ကျွန်းတွင် ရပ်နေခဲ့ကြောင်း သက်သေထွက်ဆိုချက်အရ သိရှိရပြီး Facebook သတင်းတွင် ရေးသားဖော်ပြသူ၏ ထွက်ဆိုချက်နှင့် ကိုက်ညီမှုရှိသည်ကို စစ်ဆေးတွေ့ရှိရသည်။
သို့ဖြစ်၍ အမြန်လမ်းမကြီးပေါ်တွင် သွားလာလျက်ရှိသော ခရီးသွားယာဉ်ငယ်များကို ပေါက်တူးဖြင့်ချိန်ရွယ်ပြီး အန္တရာယ်တစ်စုံတစ်ရာ ဖြစ်စေရန်နှင့် လုယက်မှုပြုလုပ်ရန်အတွက် ပြစ်မှုကို ကိုယ်ထိလက်ရောက် ကျူးလွန်ခဲ့ခြင်းမရှိသော်လည်း အမြန်လမ်းမကြီးပေါ်တွင် သွားလာလျက်ရှိသော ခရီးသွားယာဉ်ငယ်များကို စိတ်အနှောင့်အယှက် ဖြစ်စေရန် အတွက်သော်လည်းကောင်း၊ အန္တရာယ်ဖြစ်စေရန် အတွက်သော်လည်းကောင်း၊ အရက်သေစာသောက်စားထားပြီး ပေါက်တူးဖြင့် ချိန်ရွယ်၍ ယာဉ်များကို နှောင့်ယှက်ခဲ့သည့် ညွန့်ဝင်းပါ သုံးဦးအား ဥပဒေအရ အရေးယူရန် မြို့ချောင်း အမြန်လမ်းရဲစခန်း (ပ)၁၃/၂ဝ၁၄ ပြစ်မှုပုဒ်မ ၂၇၉-က အရ အမှုဖွင့်အရေးယူထားကြောင်းနှင့် တရားခံညွန့်ဝင်းနှင့် ကိုလင်းတို့နှစ်ဦးကို ည ၇ နာရီ မိနစ် ၄ဝအချိန်တွင် အမှုဖြင့် စစ်ဆေးဖမ်းဆီးပြီး ကျန်ရှိသော ကရင်(ခ) ဝင်းထူးအားဖမ်းဆီးရမိရေး ဆောင်ရွက်လျက်ရှိသည်။
ရန်ကုန်-မန္တလေး အမြန်လမ်းမကြီးတွင် အမြန်လမ်းရဲတပ်ဖွဲ့မှ တပ်ဖွဲ့ ဝင် ၆ဝဝ ဖြင့် အမြန်လမ်းရဲစခန်း ၁၅ ခု၊ အမြန်လမ်းရဲကင်း ၄ဝ၊ လှည့်ကင်းယာဉ်နှင့် အုပ်ချုပ်မှုယာဉ် ၅ဝ၊ မီသတ်ကား ၁၅ စီးတို့ဖြင့် ယာဉ်စည်းကမ်း၊ လမ်းစည်းကမ်းထိန်းသိမ်းခြင်း၊ လုံခြုံရေးတာဝန်များကို ၂၄ နာရီပတ်လုံး အဆိုင်းများခွဲ၍ ဆောင်ရွက်လျက်ရှိခြင်း၊ ခရီးသွားပြည်သူများ ဒေသခံပြည်သူများ၏ ကြုံတွေ့ရသော အခက်အခဲများကို နေ့ရော၊ ညပါ ကူညီဆောင်ရွက်ပေးခြင်းများအပြင် ယခုကဲ့သို့ ခရီးသွားယာဉ်များအား နှောင့်ယှက်ခြင်း၊ အန္တရာယ်ပြုမူခြင်းများ ဖြစ်ပေါ်လာပါက အချိန်နှင့် တစ်ပြေးညီ အမြန်လမ်းရဲစခန်းများသို့ သတင်းပေးတိုင်ကြားရန်နှင့် ပြစ်မှု ကျူးလွန်သူများအားလည်း ထိရောက်ဟန့်တားသော ပြစ်ဒဏ်ရရှိရေး အရေးယူဆောင်ရွက်လျက်ရှိကြောင်း၊ အမြန်လမ်းရဲတပ်ဖွဲ့၏ Hot Line ဖုန်း နံပါတ်များဖြစ်သည့် ဝ၉-၄၂ဝ၈၈၈၈ဝ၁ မှ ဝ၉-၄၂ဝ၈၈၈၈၇ဝ အထိ ဆက်သွယ်တိုင်ကြားနိုင်ကြောင်း သတင်းထုတ်ပြန်ထားရှိသည်။ (သတင်းစဉ်)
Myanmaalinn
No comments:
Post a Comment