အီရတ်နိုင်ငံရေးတွင် စစ်ရေးအရ ဝင်ရောက် မစွက်ဖက်ရန် အီရန် သတိပေး
Jun 16, 2014
တီဟီရန်ဇွန်၁၅
အစိုးရတပ်ဖွဲ့များနှင့် အစွန်းရောက် လက်နက်ကိုင် သူပုန် များကြား ပဋိပက္ခများ ဖြစ်ပွားလျက်ရှိသော အီရတ်နိုင်ငံ အရေးတွင် ပြည်ပနိုင်ငံများအနေနှင့် စစ်ရေးအရ ဝင်ရောက်စွက်ဖက်ခြင်း မပြုလုပ်ရန် အီရန်နိုင်ငံက သတိပေး ပြောကြားလိုက်သည်ဟု CNA သတင်းဌာန တွင် ဖော်ပြထားသည်။ ပါရှန်းပင်လယ်ကွေ့သို့ စစ် သင်္ဘောတစ်စင်း စေလွှတ်ထားသည်ဟု အမေရိ ကန်ပြည်ထောင်စုက ပြောကြားခဲ့ပြီးနောက်တွင် အီရတ်နိုင်ငံ သို့ နိုင်ငံခြားတပ်များ ကျူးကျော်ဝင်ရောက် ပါက ပဋိပက္ခများ ပိုမိုဆိုးရွားသွားလိမ့်မည်ဟု အီရန်နိုင်ငံ က သတိပေးပြောကြားခဲ့သည်။ “အကြမ်းဖက်မှုနဲ့ အစွန်းရောက် ဝါဒီတွေကို တန်ပြန်နှိမ်နင်းဖို့ လိုအပ် တဲ့ ပြင်ဆင်မှုတွေနဲ့ စွမ်းဆောင်ရည်တွေ အီရတ်နိုင်ငံမှာ ရှိပါတယ်” ဟု နိုင်ငံခြားရေး ဝန်ကြီးဌာန၏ ပြောရေး ဆိုခွင့်ရ ပုဂ္ဂိုလ်တစ်ဦးကပြောကြားသည်။ အီရတ်နိုင်ငံ တွင် ဆွန်နီသူပုန်များသည် နိုင်ငံမြောက်ပိုင်း ဒေသများ တွင် တိုက်ခိုက်သိမ်းပိုက်မှုများ ပြုလုပ်ခဲ့ပြီးနောက် မြို့တော်ဘဂ္ဂဒက်နှင့် မိုင် ၅၀ ခန့် အဝေးထိ ချီတက်လာ ခဲ့ပြီး အစိုးရတပ်များနှင့် တိုက်ပွဲများအပြင်းအထန်ဖြစ် ပွားခဲ့သည်။ အီရတ်နိုင်ငံတွင် ဖြစ်ပွားလျက်ရှိသော အခြေအနေများအပေါ် တုံ့ပြန်သည့်အနေနှင့် အမေရိ ကန်အစိုးရက အမေရိကန် လေယာဉ်တင် သင်္ဘော USS GeorgeH.W.Bushကိုပါရှန်းပင်လယ်ကွေ့သို့ စေလွှတ် ထား သည်ဟု ပြီးခဲ့သော စနေနေ့က ပြောကြားခဲ့သည်။ ထိုကဲ့သို့ USS George H.W. Bush လေယာဉ်တင် သင်္ဘောကို ပင်လယ်ကွေ့သို့ စေလွှတ်ထားသည်ဟု အမေရိကန်အစိုးရက ပြောကြားအပြီး တစ်ရက်အကြာ တွင် အီရန်နိုင်ငံခြားရေး ဝန်ကြီးဌာန၏ ပြောရေးဆို ခွင့်ရ ပုဂ္ဂိုလ် အက်ဖ်ခန်က သူ့အနေနှင့် အီရတ်နိုင်ငံသည် အကြမ်းဖက်မှုကို တွန်းလှန်နိုင်သည့် အရည်အသွေး ရှိပြီး အိမ်နီးချင်းနိုင်ငံများ၏ အကူအညီကို တောင်းခံ လိမ့်မည် မဟုတ်ဟုယုံကြည်ကြောင်းပြောကြား ခဲ့သည်။ သို့သော် အမေရိကန်ပြည်ထောင်စုကသာ အီရတ်နိုင်ငံ တွင် ဆွန်နီလက်နက်ကိုင် သူပုန်များကို ဝင်ရောက်တိုက် ခိုက် နှိမ်နင်းမည် ဆိုပါက အီရန်နိုင်ငံ အနေနှင့်လည်း အမေရိကန်တို့နှင့် ပူးပေါင်းကာ ဝင်ရောက် တိုက် ခိုက်ကောင်းတိုက်ခိုက်မည်ဟုလည်း မစ္စတာ အက်ဖ်ခန် က ပြောကြားခဲ့သည်။ အီရန်နှင့် အမေရိ ကန်ကြား တွင် သံတမန်ရေးရာ ဆက်ဆံမှု မရှိသည်မှာ ဆယ်စုနှစ် သုံးခုခန့် ရှိနေပြီ ဖြစ်သဖြင့်အီရတ်နိုင်ငံအရေး တွင် အမေရိကန်တို့နှင့်ပူးပေါင်းဆောင်ရွက်ကောင်း ဆောင်ရွက်မည် ဟူသော မစ္စတာအက်ဖ်ခန် ၏ ပြောကြားမှုမှာ နိုင်ငံတကာ အသိုင်းအဝိုင်းကြားတွင် အံ့အားသင့်စရာ ဖြစ်ခဲ့ရသည်။ “တကယ်လို့ အမေရိကန်ကသာ အီရတ်မှာ အကြမ်းဖက် နှိမ်နင်းမှုတွေ လုပ်မယ်ဆိုရင် ကျွန်တော်တို့ အဲဒီလိုလုပ်ဖို့စဉ်းစားရ ပါမယ်”ဟုမစ္စတာအက်ဖ်ခန်ကပြောကြားခဲ့သည်။ ဆွန်နီ သူပုန်များ၏ အလျင်အမြန် ထိုးစစ်ဆင်မှုများကြောင့် အစောပိုင်းတွင် အီရတ်အစိုးတပ်များ အရေးနိမ့်ခဲ့သော် လည်း ပြီးခဲ့သော စနေနေ့ကမူ အစိုးရတပ်ဖွဲ့ဝင်များသည် ဘဂ္ဂဒက်မြို့ မြောက်ပိုင်းရှိ မြို့နှစ်မြို့ကို သူပုန်များလက် မှ ပြန်လည် သိမ်းယူနိုင်ခဲ့သည်။
No comments:
Post a Comment