စစ်ကိုင်းတိုင်းဒေသကြီး ဆားလင်းကြီး မြို့နယ်အတွင်းရှိ လက်ပံတောင်းတောင်ဒေသ တွင် ဒေါ်ခင်ဝင်းကို သတ်သူများအား ဥပဒေအရ အရေးယူပေးရန်နှင့် သတ္တုတူးဖော်ရေး အားလုံးရပ်ဆိုင်းထားရန် မန္တလေးတွင် ဇန်နဝါရီ ၁ ရက်က ဆန္ဒပြခဲ့ကြသည်။
အဆိုပါဆန္ဒပြပွဲတွင် မန္တလေးရှိ သံဃာတော်များ၊ ကျောင်းသားများ၊ နိုင်ငံရေးအင်အားစုများနှင့် တောင်သူများက ၃၅ လမ်းနှင့် ၈၅ လမ်းထောင့်ရှိ မြတောင်ကျောင်းတိုက်မှ ၃၅ လမ်းအတိုင်း ၇၈ လမ်းထိ၊ ထိုမှတစ်ဆင့် ၂၆ လမ်းမှ ၈၄လမ်းထိ၊ ထို့နောက် ၈၄ လမ်း အတိုင်း မြတောင်ကျောင်းတိုက်ရှေ့သို့ ပြန် လည်သွားရောက်ကာ နိုင်ငံတော်သီချင်းသီ ဆိုခဲ့ကြကြောင်း သိရသည်။
ထို့အပြင် လက်ပံတောင်းတောင်ဒေသတွင် ဒေါ်ခင်ဝင်းသေဆုံးခဲ့ရပြီး လူ ၄ဝ ခန့် ဒဏ်ရာပြင်းထန်စွာ ရရှိခဲ့သော အာဏာပိုင်တို့၏ အကြမ်းဖက်မှုလုပ်ရပ်အား ပြင်းထန်စွာ ရှုတ်ချကန့်ကွက်ကြောင်း မန္တလေးနိုင်ငံရေး အင်အားစုအသီးသီးက ပူးတွဲသဘောထား ထုတ်ပြန်ခဲ့ပြီး ကြေးနီစီမံကိန်းနှင့် ပတ်သက်၍ စုံစမ်းရေးကော်မတီ အစီရင်ခံစာပါ အချက်များအတိုင်း တိကျစွာ အကောင်အထည်ဖော် ဆောင်ရွက်ပေးရန်၊ ဒေါ်ခင်ဝင်းအား သတ်ဖြတ်သူများအား ဥပဒေအရ အရေးယူပေးရန်၊ လျော်ကြေး ယူမထားသော မြေယာများကို အဓမ္မခြံခတ်ယူထားခြင်းကို ချက်ချင်းဖြုတ်သိမ်းပေးရန်၊ တိကျသေချာ ပြည့်စုံသော သဘာဝပတ်ဝန်းကျင်နှင့် လူမှုဘဝထိခိုက်မှု အစီရင်ခံစာ မထွက်သေးမီ သတ္တုတူးဖော်ရေး အားလုံးရပ်ဆိုင်းထားရန်၊ ဥပဒေနှင့်မညီဘဲ မြို့နယ်အုပ်ချုပ်ရေးမှူးက ထုတ်ပြန်ထားသော ပုဒ်မ ၁၄၄ ကို ရုပ်သိမ်းပေးရန် တောင်းဆိုခဲ့ကြသည်။
eleven media group
No comments:
Post a Comment