မန္တလေး- မန္တလေးမှ ချီတက်လာသည့် သပိတ်မှောက်ကျောင်းသားများသည် ယနေ့ (ဇန်န၀ါရီ ၂၇
ရက်) နေ့လည် တစ်နာရီ သုံးဆယ်ဝန်းကျင်က မြင်းခြံ-တောင်သာလမ်းပေါ်တွင် ဆက်လက်ချီတက်နေကြပြီး ၎င်းတို့ ရောက်ရှိနေသည့် နေရာမှ နောက်ထပ် လေးမိုင်အကွာရှိ မြင်းခြံမြို့နှင့် တောင်သာကြားနေရာတွင် သံဆူးကြိုးများနှင့်အတူ ရဲအင်အားတစ်ရာဖြင့် ပိတ်ဆို့ထားသည့် ပထမဆုံးဂိတ်ကို ရောက်ရှိမည်ဖြစ်ကြောင်း သတင်းရရှိသည်။
ယနေ့ နံနက်ပိုင်းက သပိတ်မှောက်ကျောင်းသားများ ဖြတ်သန်းလာခဲ့သည့် မြင်းခြံအထွက်ဂိတ်ကိုလည်း ပိတ်ထားလိုက်ပြီဖြစ်ပြီး မည်သည့်ယာဉ်မျှ အဖြတ်သန်းမခံတော့သဖြင့် မြင်းခြံမြို့မှ သပိတ်မှောက်ကျောင်းသားများထံမည်သူမှသွားရောက်၍မရတော့ကြောင်း သိရသည်။
ထို့ကြောင့် သပိတ်မှောက် ကျောင်းသားများ၏ လက်ရှိအခြေအနေသည် အရှေ့အနောက်ပိတ်ဆို့ခံထားရသည့် အခြေအနေတွင်ရှိနေကြောင်း ဗမာနိုင်ငံလုံးဆိုင်ရာ ကျောင်းသားများ သမဂ္ဂအဖွဲ့ချုပ် တွဲဖက် အတွင်းရေးမှူး ကိုမင်းသွေးသစ်က ယနေ့ နေ့လည် တစ်နာရီ သုံးဆယ်ဝန်းကျင် အချိန်က တယ်လီဖုန်းဖြင့်ဆက်သွယ်ပြောကြားသည်။
ရှေ့နောက် အပိတ်ခံရပါက ၎င်းတို့အနေဖြင့် ထိုင်သပိတ်ပြုလုပ်သွားမည်ဖြစ်ကြောင်း ကိုမင်းသွေးသစ်က ဆက်လက်ပြောကြားသည်။
လက်ရှိအချိန်တွင် သပိတ်မှောက်ကျောင်းသားဆန္ဒပြအင်အားတစ်ထောင်ကျော်ရှိနေပြီး၊ လူမှုရေးနှင့်နိုင်ငံရေးအဖွဲ့အစည်းများကလည်း လာရောက်ဝန်းရံပေးနေကြောင်း သိရသည်။
မြင်းခြံ-တောင်သာ လမ်းပေါ်တွင် ယခုကဲ့သို့ ရှေ့နောက်ပိတ်ဆို့ထားသည့် အခြေအနေဖြစ်နေသော်လည်း ၎င်းအနေဖြင့် ပိတ်ဆို့တားဆီးထားခြင်းမရှိဟု တောင်သာမြို့နယ် ပြည်သူ့လွှတ်တော်ကိုယ်စားလှယ် ဦးအောင်သောင်းကပြောသည်။
‘‘အခြားနည်းနဲ့ ပိတ်တာဆို့တာတော့ အဘတို့နဲ့ မဆိုင်ဘူးလေ။ အဘတို့ရဲ့ လုပ်ပိုင်ခွင့်လည်း မရှိပါဘူး။ အဘတို့မှာ ဘာအဖွဲ့မှလည်း မရှိပါဘူး၊ဘာအင်အားမှလည်း မရှိပါဘူး’’ဟု ဦးအောင်သောင်းက ယနေ့နံနက်ပိုင်းကပြောကြားသွားသည်။
သပိတ်မှောက် ကျောင်းသားများ ထံသို့ ရတနာပုံတက္ကသိုလ်၊ မန္တလာကောလိပ်၊ မန္တလေးတက္ကသိုလ်၊ နည်းပညာတက္ကသိုလ် (စစ်ကိုင်း) တို့မှ ကျောင်းသား ၃၀ ကျော် သွားရောက်ပူးပေါင်းရန် စီစဉ်လျက်ရှိကြောင်း သိရသည်။
အလားတူ မုံရွာတက္ကသိုလ်မှ ကျောင်းသားအချို့လည်း ထွက်လာပြီဖြစ်ပြီး၊ တက္ကသိုလ်ကျောင်းသားများအပြင် အခြေခံပညာကျောင်းမှ ကျောင်းသားအချို့လည်း ပါဝင်မည်ဖြစ်သည်ဟု နည်းပညာတက္ကသိုလ် (စစ်ကိုင်း)မှ ကျောင်းသားသမဂ္ဂ အဖွဲ့မှ ကိုဟန်ဇင်ထွန်းက ပြောသည်။
ဆန္ဒပြကျောင်းသားများအား မန္တလေးတက္ကသိုလ် ပါမောက္ခချုပ် ဒေါက်တာ မောင်သင်းနှင့်အဖွဲ့မှ လာရောက်တွေ့ဆုံပြီး ဇန်န၀ါရီလ (၂၈) ရက် နံနက်တွင် ပညာရေးဝန်ကြီးနှင့် တွေ့ဆုံညှိနှိုင်းပေးရန် စီစဉ်နေသည်ဟု သိရကြောင်း မြင်းခြံဒေသခံများ ကပြောသည်။ သို့သော် အခင်းဖြစ်ပွားရာနေရာထံ ဆက်သွယ်၍ မရသေးပါ။
7Day
No comments:
Post a Comment