NLD အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်ဟာ ဒီကနေ့ စက်တင်ဘာလ ၁၀ ရက်နေ့မှာ ကယားပြည်နယ်ကို ၃ ရက်ကြာ မဲဆွယ် စည်းရုံးရေး ခရီးစဉ် စတင်ဖို့ ရှိပါတယ်။
ဒီခရီးစဉ်ဟာ ရွေးကောက်ပွဲအတွက် ဒေါ်အောင်ဆန်းစုကြည်ရဲ့ ပထမဆုံး တရားဝင် မဲဆွယ်စည်းရုံးရေး ခရီးစဉ် ဖြစ်ပါတယ်။
အခုအခါ တရားဝင် မဲဆွယ်စည်းရုံးခွင့် ရပြီမို့ ကယားပြည်နယ်တွင်းမှာ ရှိတဲ့ NLD ကိုယ်စားလှယ်လောင်း တွေအတွက် မဲဆွယ်စည်းရုံးပေးတဲ့ ခရီးစဉ် ဖြစ်တယ်လို့ NLD ဗဟို အလုပ်အမှုဆောင် အဖွဲ့ဝင် ဦးဝင်းထိန်က ဘီဘီစီကို ပြောပါတယ်။
ဒေါ်အောင်ဆန်းစုကြည်ဟာ ကယားပြည်နယ်ထဲက ၇မြို့နယ် စလုံးကို သွားရောက်မှာဖြစ်သလို အစိုးရ အဖွဲ့ဝင် ဝန်ကြီးတွေ ဝင်ရောက်ယှဉ်ပြိုင်ဖို့ ရှိတဲ့ ရှားတောနဲ့ ဘော်လခဲမြို့နယ်တွေမှာ လူထုဟောပြောပွဲ တွေ လုပ်ဖို့စီစဉ်ထားပါတယ်။
ကယားပြည်နယ်မှာ ပြီးခဲ့တဲ့ ရွေးကောက်ပွဲမှာ အနိုင်ရထားတဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေး ပါတီအပြင် တသီးပုဂ္ဂလအနေနဲ့ အစိုးရအဖွဲ့ဝင် ဝန်ကြီးတွေဖြစ်တဲ့ ဦးအောင်မင်းက ရှားတောမြို့နယ်၊ ဦးစိုးသိန်းက ဘော်လခဲမြို့နယ်တွေမှာ ဝင်ရောက် ယှဉ်ပြိုင်ကြမှာ ဖြစ်ပါတယ်။
ဒါ့အပြင် အမျိုးသားဒီမိုကရေစီအဖွဲ့ချုပ်က ခွဲထွက်ပါတီဝင်တွေ ပါဝင်တဲ့ ကယားလူမျိုးစု ဒီမိုကရေစီ ပါတီကလည်း မဲဆန္ဒနယ် အတော်များများမှာ ဝင်ပြိုင်ကြမှာပါ။
ဒေါ်အောင်ဆန်းစုကြည်ဟာ စက်တင်ဘာလ ၁၂ရက်နေ့ ညနေပိုင်းမှာ လွိုင်ကော်ကနေ ရန်ကုန်ကို လေယာဉ်နဲ့ ပြန်လာမယ်လို့ သိရပါတယ်။
BBC
https://www.blogger.com
No comments:
Post a Comment