“ရိုဟင်ဂျာ” ဟူသည့် စကားလုံး မသုံးရန် ကုလကိုယ်စားလှယ်အား အစိုးရ အကြိမ်ကြိမ် သတိပေးခဲ့

မြန်မာနိုင်ငံဆိုင်ရာ ကုလသမဂ္ဂ အထူးကိုယ်စားလှယ် မစ္စယန်ဟီးလီက ၂၀၁၄ခုနှစ် ဇူလိုင်လ ၂၆ရက် ညနေပိုင်းက ရန်ကုန်အပြည်ပြည်ဆိုင်ရာလေဆိပ်တွင် သတင်းစာရှင်းလင်းပွဲ ပြုလုပ်စဉ်။ (ဓာတ်ပုံ-ဟိန်းထက်၊ မဇ္ဈိမ)

ရန်ကုန်၊ မဇ္ဈိမ။ ။ မြန်မာနိုင်ငံသို့ ပထမဦးဆုံးအကြိမ် လာရောက်ခဲ့သည့် ကုလသမဂ္ဂ လူ့အခွင့်အရေး ကိုယ်စားလှယ် မစ္စရန်ဟီးလီ ရခိုင်ပြည်နယ်သို့ သွားရောက်ခဲ့စဉ် “ ရိုဟင်ဂျာ” ဟူသည့် အသုံးအနှုန်းအား မသုံးရန် အစိုးရက ထပ်ခါထပ်ခါ သတိပေးခဲ့သည်ဟု မစ္စရန်ဟီလီက သတင်းမီဒီယာများအား ထုတ်ဖော် ပြောဆိုလိုက်သည်။


အစိုးရ ပြောဆိုခဲ့ခြင်းနှင့် ပတ်သက်၍ မစ္စ ရန်ဟီလီက “ ရိုဟင်ဂျာဆိုတာကို အသိအမှတ်ပြုမထားဘူး၊ ဒါ့ကြောင့် ရိုဟင်ဂျာဆိုတဲ့ စကားလုံးကို သုံးလို့ မရဘူးလို့ ကျွန်မကို အစိုးရက အကြိမ်ကြိမ်ပြောခဲ့တယ်”ဟု သတင်းမီဒီယာများအား ပြန်လည် ပြောပြခဲ့သည်။

ထိုသို့ အစိုးရက “ ရိုဟင်ဂျာ”ဟု ခေါ်ဝေါ်ခွင့် ပိတ်ပင်ခဲ့ခြင်းနှင့် ပတ်သက်၍ နိုင်ငံသား၊ လူမျိုးစု၊ ဘာသာရေး၊ ဘာသာစကားဆိုင်ရာ စရိုက်လက္ခဏာတို့အား အခြေခံပေါ်ပေါက်လာကာ မိမိတို့ကိုယ် မိမိ အသိအမှတ်ပြုခြင်းသည် လူနည်းစုများ၏ အခွင့်အရေးဖြစ်ပြီး ထိုသူများအပေါ်တွင် ခွဲခြား ဆက်ဆံမှုများ မရှိစေရန်မှာ အစိုးရ၏ တာဝန်ဝတ္တရားများနှင့် သက်ဆိုင်သည်ဟု မစ္စရန်ဟီးလီက ပြောသည်။ မစ္စရန်ဟီလီမှ မိမိမှာ လွတ်လပ်သည့် လူ့အခွင့်အရေးဆိုင်ရာ လွတ်လပ်သူ တစ်ဦးဖြစ်သဖြင့် ပြောဆိုခြင်းဖြစ်သည်ဟုလည်း ဆိုသည်။

ရခိုင်ပြည်နယ်ရှိ ဒုက္ခသည်စခန်းများသို့ သွားရောက်ရာတွင် ဗုဒ္ဒဘာသာများ နေထိုင်သည့် စခန်းများနှင့် အစ္စလာမ်ဘာသာဝင်များ နေထိုင်သည့် စခန်းများကို သွားရောက်ခဲ့ပြီး နှစ်ဘက်လုံးတွင် အခက်အခဲများ ရှိနေသည်ဟု သူမက ပြောသည်။ စခန်းများတွင် လျှပ်စစ်မီးများ၊ အိမ်သာများ မရှိသဖြင့် စခန်းတွင်း နေထိုင်သည့် အမျိုးသမီးများနှင့်
ကလေးများမှာ ခက်ခဲသည့် နေ့စဉ် ဘ၀များကို ဖြတ်သန်းနေရသည်ဟုလည်း မှတ်ချက်ပြုသွားသည်။

ရခိုင်ပြည်နယ်တွင် ၀န်ကြီးချုပ်နှင့် တွေ့ဆုံကာ ၁၉၈၂ ခုနှစ် ဥပဒေဖြင့် နိုင်ငံသားစိစစ်ခြင်း လုပ်ငန်းစဉ်များကိုလည်း မေးမြန်းခဲ့သည်။

မစ္စရန်ဟီးလီမှာ လူ့အခွင့်အရေးဆိုင်ရာ ကိစ္စရပ်များ၊ ကလေးသူငယ်များ၏ အခွင့်အရေးကိစ္စရပ်များနှင့် ပတ်သက်သည့် ကျွမ်းကျင်သည့် ပါမောက္ခတစ်ဦးဖြစ်ပြီး လက်ရှိတွင် တောင်ကိုရီးယားနိုင်ငံ၊ ဆောင်ကျိုဝမ်တက္ကသိုလ်တွင် ပါမောက္ခအဖြစ် တာဝန်ထမ်းဆောင်နေသည်။
mizzima