တယ်လီနောမြန်မာ၏ “မြန်မာရဲ့ တေးသွားငွေကြယ်ပွင့်” ပြိုင်ပွဲ ဆုပေးပွဲကို ယခုလ ၂၂ ရက်နေ့ နေ့လည် ၁ နာရီမှ ညနေ ၃ နာရီအထိ ရန်ကုန်၊ အလံပြဘုရားလမ်း၊ Park Royal ဟိုတယ်တွင် ကျင်းပပြုလုပ်ခဲ့သည်။
ဆုပေးပွဲတွင် ပထမဆု ကျပ် သိန်း ၁၀၀ ကို ရန်ကုန်မြို့၊ ပုစွန်တောင်မြို့နယ်မှ လာရောက်ယှဉ်ပြိုင်သူ အသက် ၂၁ အရွယ်၊ စီးပွားရေးအဝေးသင် တတိယနှစ်ကျောင်းသား လင်းမြတ်အောင်က ရရှိသွားပြီး ကျန်နှစ်ဆု သိန်း ၂၀ စီအား ဒုတိယဆုကို ကရင်ပြည်နယ်၊ ဘားအံမြို့၊ ဇီးတောမှ အဲနေထူးက လည်းကောင်း၊ တတိယဆုကို ရန်ကုန်မြို့၊ လှိုင်မြို့နယ်မှ သော်ဇင်ဟိန်းက လည်းကောင်း အသီးသီးရရှိခဲ့သည်။
“ကျနော် အခုလက်ရှိ အရမ်းပျော်လွန်းလို့ ဘာပြောရမှန်းတောင် မသိပါဘူး။ ဒီပြိုင်ပွဲ ဝင်ဖြစ်ခဲ့တာကတော့ ကျနော် ကြော်ငြာတွေတွေ့တယ်၊ နောက် သူငယ်ချင်းတွေကလည်း ပြောတယ်၊ အဲဒီကနေ ကျနော် ပြိုင်ပွဲ ဝင်ဖြစ်တာပါ။ ပထမ ဒီပြိုင်ပွဲအတွက် တီးလုံးတွေ လုံးဝ စဉ်းစားလို့ မရဘူး။ နောက်ကျတော့ ကျနော်ခါတိုင်းလိုပဲ ပုံမှန်ဂစ်တာတီးရင်းနဲ့ သံစဉ်လေးတခု ပါးစပ်က စညည်းမိတာ၊ အဲဒါလေးကိုပဲ အလုံးလေးတွေ အဖြစ် Notes လေးတွေ ရေးပြီးတော့ ဖန်တီးဖြစ်ခဲ့တာပါ” ဟု ပထမဆုရရှိခဲ့သည့် လင်းမြတ်အောင်က ဧရာဝတီကို ပြောသည်။
တယ်လီနော၏ မိုဘိုင်းဖုန်း ဝန်ဆောင်မှုများတွင် အသုံးပြုသွားမည့် တေးသံစဉ်များအတွက် အဆိုပါပြိုင်ပွဲကို ဇွန်လ နောက်ဆုံးပတ်က စတင်ပြုလုပ်ခဲ့ပြီး ပြိုင်ပွဲဝင် ရှစ်ထောင်ကျော်ထဲမှ ဆန်ခါတင်သုံးဦးကို အဆင့်ဆင့် ရွေးချယ် ခဲ့ခြင်းဖြစ်သည်။ အကဲဖြတ် ဒိုင်လူကြီးများအနေဖြင့် တေးသံရှင် လင်းလင်း၊ ဂီတပညာရှင် ဓီရာမိုရ်နှင့် ခင်မြတ်မွန်တို့က စိစစ်ရွေးချယ်ခဲ့ခြင်း ဖြစ်သည်။
“စံသတ်မှတ်ချက်တွေက အဆင့်လိုက် အဆင့်လိုက်မှာ အများကြီးရှိတယ်။ အဲဒါကို အတိုချုံးပြီး ပြောရင်တော့ လွယ်ကူ ရိုးရှင်းရမယ်။ ရိုးရှင်းပေမယ့်လည်း ဆွဲဆောင်မှုရှိရမယ်။ ပညာသားပါရမယ်။ နောက်တခုက ကိုယ်ပိုင် Identity တခု ရှိရမယ်။ နားထောင်လိုက်တာနဲ့ စိတ်ဝင်စားစရာကောင်းတာ တခုရှိရမယ်။ အဲဒါပါပဲ။ ရွေးချယ်သွားတဲ့ သီချင်းကိုတော့ တယ်လီနောက သူတို့ Call Waiting Service တွေ၊ Call Center တွေမှာ သုံးသွားမယ်လို့ ကြားတယ်။ ပြိုင်ပွဲဝင် ရှစ်ထောင်ကနေ ငါးရာအထိကို အရင်ဆုံး Teams ဖွဲ့ပြီးရွေးတာပါ။ အဲဒီကနေ အဆင့်ဆင့် အယောက်ငါးရာထဲကနေ ဆန်ခါတင် သုံးယောက်ကို ပြန်ရွေးချယ်ထားတာပါ” ဟု ဒိုင်တဦးဖြစ်သူ ဂီတပညာရှင် ဓီရာမိုရ်က ဧရာဝတီကို ပြောသည်။
ဆန်ခါတင် သုံးဦးထဲမှ ပထမ၊ ဒုတိယ၊ တတိယဆု အသီးသီးကို သြဂုတ်လ ၁၂ ရက်နေ့မှ ၁၉ ရက်နေ့ အထိ ၁ ပတ်တာ ကာလအတွင်း S1, S2, S3 ဟု ကုဒ်နံပါတ်များ သတ်မှတ်ထားကာ Voting စံနစ်ဖြင့် ပရိသတ်မှ မဲပေးရွေးချယ်မှုကိုလည်း ပြုလုပ်ခဲ့ကြသည်။
ပထမဆုရရှိသွားသည့် လင်းမြတ်အောင်၏ တီးလုံးနှင့် ပတ်သက်ပြီး ဂီတပညာရှင် ဓီရာမိုရ်က “လင်းမြတ်အောင် ရဲ့ တီးလုံးကတော့ သူက ဂီတအသိုင်းအဝိုင်းထဲက မဟုတ်ဘူး။ သူက ဂီတကို မြတ်နိုးတယ်၊ ဂီတကို ဖန်တီးရတာ ဝါသနာပါတဲ့ ကောင်လေး တယောက်ပါပဲ။ ဒါပေမယ့် သူ့တီးလုံးလေးက ဘယ်လိုဖြစ်သွားလဲဆိုတော့ ရိုးရိုးလေးနဲ့ စိတ်ဝင်စားစရာကောင်းတယ်၊ ခန့်ညားတယ်၊ လူငယ်ဆန်တယ်၊ တက်ကြွတယ်၊ အားမာန်ပြည့်တယ်။ အဲဒါမျိုးတွေ အကုန်ပါတယ်။ အဲဒါကြောင့် သူ့တီးလုံးလေးက ကောင်းသွားတာပါ” ဟု ဆိုသည်။
ဆက်ပြီး သူက “ဂီတဆိုတာတော့ နေရာတော်တော်များများမှာ လူတွေ တော်တော်များများနဲ့ ထိစပ်နေပါတယ်။ ဒါပေမယ့် ဂီတကို Highlight လုပ်တာရှားတယ်။ ဖျော်ဖြေမှုအနေနဲ့သာ လုပ်ကြတာလေ။ ဒါကျတော့ ဖျော်ဖြေမှုမဟုတ်ဘူး။ ဒါ Resource ကို ဆွဲတင်တဲ့သဘောမျိုးနဲ့ လုပ်တာ။ ဒီလို Music Creation လုပ်တာလည်း ရှားတယ်။ တယ်လီနောက ဒါမျိုးကို စိတ်ဝင်စားတယ်၊ ဒါမျိုးကို မြင်တယ်ဆိုတဲ့အတွက် ကျနော်ကတော့ ဒါမျိုးကို ဝမ်းသာတယ်၊ အားပေးပါတယ်” ဟု တယ်လီနော၏ တေးဂီတပြိုင်ပွဲအပေါ် သူ့အမြင်ကို ပြောသည်။
ဧရာဝတီ
No comments:
Post a Comment