ဂွာတီမာလာ နိုင်ငံရှိ ရွာလေးတစ်ရွာတွင် ဒေသခံ တိုင်းရင်းသားများနှင့် အဆင်မပြေမှုကြောင့် ဂျူးလူမျိုးများ ဖိအားပေး ပြောင်းရွှေ့စေခြင်းနှင့် ကြုံခဲ့ရကြောင်း သတင်းရရှိသည်။
အော်သိုဒေါ့စ် ဂျူးအနွယ်ဝင် (၂၃၀)ကျော်တို့သည် ဂွာတီမာလာ အနောက်ပိုင်း ဒေသရှိ ရွာငယ်လေး တစ်ခုမှ ဩဂုတ် (၂၉)ရက်တွင် စတင်ထွက်ခွာခဲ့ကြောင်း ဒေသခံများက ပြောကြားခဲ့သည်။ ၎င်းတို့သည် ဒေသခံ တိုင်းရင်းသား လူ့အဖွဲ့အစည်းနှင့် ပဋိပက္ခအချို့ ရှိခဲ့ကြောင်း သတင်းများက ဆိုသည်။
မာယာတိုင်းရင်းသားမျိုးနွယ် ခေါင်းဆောင်ပိုင်းက ဂျူးတို့နှင့် တွေ့ဆုံဆွေးနွေးပြီးနောက် ဆန်ဟွမ်လာ လာဂူနာ ကျေးရွာမှ ထွက်ခွာသွားရန် တောင်းဆိုခဲ့ကြသည်။ တိုင်းရင်းသားများက ဂျူးတို့သည် တိုင်းရင်းသားများကို ခွဲခြားဆက်ဆံပြီး ၎င်းတို့၏ ယဉ်ကျေးမှုနှင့် ဓလေ့ထုံးစံကို အတင်းအကျပ် သွပ်သွင်းရန် ကြိုးပမ်းခဲ့ကြောင်း စွပ်စွဲခဲ့ကြသည်။
လက်ဗ်တာဟာခေါ် ဂျူးအဖွဲ့အစည်းသည် အဆိုပါ ရွာလေးတွင် လွန်ခဲ့သည့် (၆)နှစ်က စတင်အခြေချခဲ့ပြီး ၎င်းတို့အနေဖြင့် ဘာသာတရား လွတ်လပ်ခွင့်ကို ရှာဖွေနေကြောင်း ကြေညာခဲ့သည်။ ပြီးခဲ့သည့် ရက်ပိုင်းများမှ စတင်ကာ ဂျူးလူမျိုးများသည် ၎င်းတို့၏ အထုပ်အပိုးများကို ကြိုတင် ပြင်ဆင်နေခဲ့ကြောင်းလည်း သိရသည်။
“ကျွန်တော်တို့က ငြိမ်းငြိမ်းချမ်းချမ်းပဲ နေချင်တာပါ။ ခုလို ဖြစ်ရပ်မျိုးကို ရှောင်ရှားချင်တာကြောင့် ထွက်ခွာဖို့ ပြင်ဆင်နေကြတာပါ”ဟု လက်ဗ်တာဟာ အဖွဲ့ဝင် မီဆေးလ်ဆန်တို့စ်က AFPသို့ ပြောကြားခဲ့သည်။ “ကျွန်တော်တို့ဟာ ရွာမှာ ဆက်နေဖို့ အခွင့်အရေး အပြည့်ရှိပါတယ်။ ဒါပေမဲ့ ရွာခံတွေက ကျွန်တော်တို့ကို လူစုလူဝေးနဲ့ ရန်ပြုလာမယ် ဆိုတာမျိုး ခြိမ်းခြောက်ခဲ့ပါတယ်”ဟုလည်း ၎င်းက ဆိုသည်။
လက်ဗ်တာဟာ ဂျူးအဖွဲ့အစည်းသည် ဂွာတီမာလာ နိုင်ငံအတွင်း တစ်နေရာရာတွင် အခြေချ နေထိုင်နိုင်ရန် မျှော်လင့်ထားကြသည်။ အဆိုပါ ဂျူးလူမျိုးများတွင် ဆန်ဟွမ်လာ လာဂူနာ၌ လွန်ခဲ့သည့် (၆)နှစ် ကတည်းက အခြေချခဲ့သူများအပြင် ယခုနှစ် အစောပိုင်းကမှ အာဏာပိုင်များနှင့် အဆင်မပြေဘဲ ကနေဒါမှ ကူးပြောင်း ရောက်ရှိလာသူများပါ ပါဝင်ကြောင်း သိရှိရသည်။
_BBC
No comments:
Post a Comment