အီရန်နျူကလီယား သဘောတူညီမှု ပင်လယ်ကွေ့နိုင်ငံတွေ သတိထားကြိုဆို

အီရန်နိုင်ငံနဲ့ ရရှိခဲ့တဲ့ နျူကလီယားဆိုင်ရာ သဘောတူညီချက်ကို အကောင်ထည်ဖေါ်နိုင်ပြီဆိုရင် ဒေသတွင်းလုံခြုံရေးကို အထောက်အကူပြု နိုင်လိမ့်မယ်လို့ ပင်လယ်ကွေ့ဒေသ ပူးပေါင်းဆောင်ရွက်ရေး ကောင်စီ GCC အဖွဲ့ဝင် နိုင်ငံတွေရဲ့ နိုင်ငံခြားရေးဝန်ကြီးတွေက သဘောတူကြကြောင်း အမေရိကန် နိုင်ငံခြားရေးဝန်ကြီး John Kerry က ပြောဆိုလိုက်ပါတယ်။

အီရန်နိုင်ငံနဲ့ ရရှိထားတဲ့ နျူကလီယားဆိုင်ရာ သဘောတူညီမှုနဲ့ တခြားအကြောင်းအရာတွေကို ပင်လယ်ကွေ့ဒေသ နိုင်ငံခြားရေးဝန်ကြီးတွေနဲ့ ကာတာနိုင်ငံ ဒိုဟာမြို့မှာ တွေ့ဆုံဆွေးနွေးပြီးတဲ့နောက် ဝန်ကြီး Kerry က အခုလို ပြောကြားလိုက်တာဖြစ်ပါတယ်။

ဆွေးနွေးကြရာမှာ ဒေသတွင်းလုံခြုံရေး တိုးမြှင့်ဆောင်ရွက်ဖို့ လုပ်ငန်းကော်မတီတွေဖွဲ့စည်းဖို့ နှစ်ဘက် သဘောတူညီခဲ့ကြပြီး ထောက်လှမ်းရေးသတင်းအချက်လက်တွေဖလှယ်ဖို့၊ အထူးတပ်ဖွဲ့တွေကို လေ့ကျင့် ပေးရေးနဲ့ ရေကြောင်း လုံခြုံရေး ပူးပေါင်းဆောင်ရွက်ဖို့ စတာတွေ ပါဝင်ပါတယ်။

မစ္စတာ Kerry နဲ့ အတူ သတင်းစာရှင်းလင်းပွဲ တက်ရောက်ခဲ့တဲ့ ကာတာနိုင်ငံခြားရေးဝန်ကြီး Khaled al-Attiya က အီရန်နိုင်ငံနဲ့ ရရှိထားတဲ့ သဘောတူညီချက်ကို သတိနဲ့ ကြိုဆိုလိုက်ပြီး ဒါဟာ အသင့်တော်ဆုံး ရွေးချယ်မှု ဖြစ်တယ်လို့ ပြောပါတယ်။

GCC အဖွဲ့ဝင် ၆ နိုင်ငံအနေနဲ့ အီရန်နျူကလီယားအရေး သဘောတူညီမှုနဲ့ ပတ်သက်ပြီး မစ္စတာ Kerry ရဲ့ ရှင်းလင်းတင်ပြမှုနဲ့ ဘယ်လိုအရေးယူဆောင်ရွက်မယ်ဆိုတဲ့ အချက်တွေအပေါ် အားရကျေနပ်မှုရှိခဲ့ကြ တယ်လို့လည်း ပြောပါတယ်

ဗွီအိုအေ - မြန်မာ